((( حال الدنيا ))))
ليه الوشوش أتلونت
ولا القلوب أتحجرت
وليه العقول أتغيبت
ولا العيون أتغممت
حتي الحقيقه أتكفنت
حتي الحياة أتكحلت
وكأننا صابنا العمى
حتي الهوي تاه مننا
واللي بقي من عمرنا
ما يكفي نملك حلمنا
أما الحبيب اللي لنا
نمشي وراه ف يخمنا
ويخون عيشنا وملحنا
ويغش حتي ف حبنا
كل القلوب أتزيفت
حتي الوشوش اتبدلت
والدنيا حالها سار عدم
بين الجروح و بين الألم
مهما نداري ف الوجع
الكدب أصبح شئ مشاع
وكل شئ بقي بالدراع
و سكه اخرتها الضياع
ليه اختفت كل السباع
ولا زاد عليها غير الضباع
عايشين ع جثث الجياع
ونعمل ايه م الكل باع
فيه اللي باع حق انتفاع
وف اللي باع بعد انصياع
وفي اللي عايش ف الخنوع
مسلوب و خايف م الرجوع
أو حتي م لحظة وداع
والدنيا بنيت ع الصراع
بين الحقيقه و الخداع
ويا أما تبقي فارس شجاع
يا أما تأكلك الضباع
كلمات الشاعر / السيد علي القن
ليست هناك تعليقات:
إرسال تعليق