((( كله تمام))))
تطبل تذمر
تعلي المقام
تلزق تزوق
كمان الكلام
هتفضل هفيه
هتفضل ضحيه
وعبد الحرام
تعلي ف حاضر
وتسمع ياشاطر
كلام المدام
وتنسب لنفسك
كلام مش تمام
تلمع تورنش
وتهبش تبقشش
ماكله حرام
كفايه تصنفر
كمان الودان
تلمع بكام
وترسم بكام
ورسمك بيعجب
حقيقي المدام
وشايل حمول
وشايل هموم
جبال م اللئام
مابين حد طامع
في سلطه وجاه
وبين حد راش
مشارك معاه
ولسه ده دوره
ولسه اللي زوره
واقف ف صفه
مستف ملفه
وباقي عليه
يوسط بنيه
حلوه و شقيه
تمضي قفاه
وتغرف معاه
باق الصنيه
وسيدنا الخرنج
عامل كنج كونج
وفاكر زمانه
يدوم للنهايه
بيفرض جبايه
علي كل واحد
وناسي ان ربه
شايف وشاهد
علي كل واحد
علي كل جاحد
وتارك مفاسد
وناسي مظالم
تودي اللومان
كفايه هاريتنا
كفايه اشتريتنا
ياسيدي بكام
ما قالها الحكيم
علي كل باغي
تدور الدواير
وتلبس اساور
كمان المدام
ولدنا حراير
وما احنش عبيد
تعذب ابونا
كفايه الكورونا
بتقتل في امي
وتقتل في ابويا
وتخطف في اختي
وتقتل في اخويا
كفايه تعبنا
كفايه شبعنا
ما ترحم ابونا
ربطنا بطونا
مسحنا عقولنا
وقلنا تمام
لكن مش تمام
عشان الكنج افندي
بيشرب ف ويسكي
وياكل حمام
يفتش جيوبنا
وحافظ عيوبنا
نسلم اوام
ونسمع كلامه
ف كل مقام
ونرجع نطبل
ونرجع نزمر
ونرقص كمان
مدام كنج باشا
صديق المدام
تفتح دماغك
هترضي بكام
تقفل دماغك
عليك السلام
تودع ولادك
تفوت المدام
وتنزل ياباشا
سجين اللومان
وتلبس قضيه
تزلزل ميدان
و تقلب كيان
بلاش الازيه
وعيش في التكيه
بحاضر ياافندم
و حاضر تمام
وراع ولادك
وراع المدام
وخليك مره ناصح
وخليك مره فالح
هاتكبر بسرعه
هاتكبر قوام
وتعلي المراتب
وتعلي المناصب
وممكن تنام
وممكن تسافر
اثينا وفيينا
تصاحب في مينا
تصاحب في حنا
تصادق ف هيفا
تصادق ف بوسي
وتصرف في مالنا
بأمر المعظم
وأمر المدام
وتبقي الحكايه
ياسيدي تمام
وتفضل ياسيدي
مجاب الكلام
بأمر المفدي
الامير الهمام
كلمات الشاعر/السيد علي القن
ليست هناك تعليقات:
إرسال تعليق